2026 чылдың апрель 9–10 хүннеринде Кызылга болуп эртер «Тыва: Агроинвест-2026» инвестиция шуулганы Енисей Сибириниң агроүлетпүр комплекизин хөгжүдер адырда кол болуушкун болур. Бо чылын шуулган «Сибирьниң агроүлетпүр комплекизи – экологтуг арыг тулган продукция» деп тема-биле эртип, адырның өзүлдезиниң стратегтиг угланыышкыннарын сайгарар шөл апаар.
Ол хемчегге эрге-чагырганың федералдыг болгаш регионалдыг органнарының, хөгжүлде институттарының, ажыл-агый ниитилежилгелериниң төлээлери, ол ышкаш Кыдат Улус Республикадан болгаш Моолдан албан ёзузунуң делегациялары чыглыр. Тыва Республиканың инвестиция курлавыры база экспортче угланган бүдүрүлгени хөгжүдери, көдээ ажыл-агыйга чурагайлыг технологияларын киирери, делегей чергелиг кады ажылдажылганы калбартыры – кичээнгейниң төвүнде.
Ажыл-агыйжы программада пленарлыг болгаш инвестиция сессиялары, мал ажыл-агыйында, көдээ ажыл-агый продукциязының болбаазырадылгазында, мелиорацияда, мал чеминиң бүдүрүлгезинде, агротуризм хөгжүлдезинде алыс кедилиг төлевилелдерни таныштырары кирип турар. Улуг бизнес биле биче болгаш ортумак сайгарлыкчы чоруктуң аразында кады ажылдажылгаже, ол ышкаш чугааларны чорударынче онза кичээнгейни угландырар. Шуулганның төнчүзүнде чаңчыл езугаар кады ажылдажылга дугуржулгаларынга аттарны салыр.
2025 чылда шуулганга 741 бизнес төлээлери, ооң иштинде даштыкы партнерлар киришкен. 30 дугуржулгага атты салган, оларның элээн кажы: Тывада хой ажыл-агыйында уксаажыдылга ажылы эде чаарттынып, көдээ ажыл-агый техниканың хандырылгазы калбарып, амгы үениң мелиорация аргалары боттанып турар.
Бистиң корр.
“Шын” №7 2026 чылдың февраль 26