Кызыл арным
Кончуг соокта холдарым
Хол-хаптарны кедиптер.
Буттарым-даа идикти
Муңзавайн солуурлар.
Борбак бажым бөрттерни
Бо-ла далдап кедер-дир.
Хөрээм, ооргам доңарга,
Хөректээжим шуглап аар.
Чалын изиг, чаржаң соокта,
Чайын, кыжын – кажанда-даа
Чүгле чаңгыс кызыл арным
Чүү-даа кетпес – чадагай...
Черле ындыг
Черле ындыг.
Четчир, шору чоруур шааңда
Сеңээ төрел улус-ла хөй.
Угбамайлаан, дуңмамайлаан,
Уруумайлаан, кудамайлаан,
Эжимейлээн, чуржумайлаан,
Эң-не эки кунчуумайлаан,
Чеңгем-даа дээр,
чээним-даа дээр.
Черле ындыг.
Черле ындыг.
Сени кежик оя бээрге,
Сеңээ төрел улус төнер.
Угба эвес, дуңма эвес,
Уруу эвес, куда эвес,
Эжи, чээни, чуржу эвес,
Эң-не эки кунчуу эвес,
Чеңгези-даа эвес боор сен.
Черле ындыг.
Мээң үем-оруктажым...
Үе-биле төрүттүнгеш, үе-биле ойнап-хөглеп, үе-биле өөренип, үе-биле чергележип, үем-биле үежи бооп өзүп келдим.
Айдың дүне амыдырал-чуртталга дээш, ажыл-иш дээш, арын-нүүр дээш, алыс боттуң туружу дээш, үе-биле сүмележип, эжишки дег деткижип-даа, херек өйде үе-биле өжээги дег, месилдежип чурттап чор мен...
Үе, үем... Каптагайдан адырылгаш, хая көрбес болгужемче, үе – өжээтим-даа, өңнүүм-даа боор, мээң үем – каашпазым оруктажым.
Мария КҮЖҮГЕТ.
“Шын” №4 2026 чылдың февраль 5