«Россия» национал төпке чурттуң Президентизи Владимир Путин Россияның чоннарының чаңгыс деминиң чылын эгелээн деп чарлаан. Ол хемчег «Билиглер» ниитилелиниң «Россия — өг-бүлелерниң өг-бүлези» деп марафонунуң бир кезээ болган. Россия Федерациязының 89 субъектизиниң төлээлери-биле кады Тыва Республика телекөвүрүгнүң байырлыг хемчээнге киришкен.
Регионнуң Баштыңы Владислав Ховалыг 70 ажыг омак-сөөк чоннарның төлээлери амыр-тайбың болгаш эп-найыралдыг чурттап чоруур Тывага чарлаттынган чыл онзагай деп демдеглээн.
Күрүне баштыңы Россияның чоннарының чаңгыс деминиң чылы ажыттынган деп чарлап тура, чурттуң тиилелгелери болгаш чедиишкиннери ооң чоннарының каңнаттынган чаңгыс демин көргүзүп турарын демдеглээн.
«Фронт шугумунда-даа, тускай шериг операциязының девискээринде-даа бистиң дайынчыларывыс болгаш маадырларывыс омак-сөөгү база шажын-чүдүлгелери ылгалдыг-даа болза, бот-боттарын «акый, дуңмай» деп адап чоруурлар. А ол дыка үнелиг»— деп, Президент чугаалаан.
Марафонга Россияның аңгы-аңгы чоннарының 2900 ажыг төлээлери чыылган. Тываның делегациязы «Тиилелге» спорт-культура төвүнден дорт дамчыдылга дамчыштыр байырлыг ёзулалдың киржикчилеринге байырны чедирген.
«Күрүне баштыңы аңгы-аңгы чоннар төлээлериниң аразында сүлде-сүзүктү болгаш бот-боттарынга хүндүткелди быжыглаарынга бо болуушкун онза рольдуг деп демдегледи. Кандыг-даа бергелерни кады ажып эрте бээр бис! Россияның күчү-күжү — чаңгыс деминде!» — деп, Тываның Баштыңы демдеглээн.
Владислав Ховалыг республиканың парламентизинге Айыткалында Президент Владимир Путинниң чуртта национал политиканы быжыглаар болгаш хөгжүдер дээш, 2026 чылды Россияның чоннарының чаңгыс деминиң чылы кылдыр чарлаан эгелээшкининиң стратегтиг ужур-утказын демдеглээнин сагындыраал.
Регионнуң удуртукчузу 73 аңгы нациялар болгаш чоннар төлээлери чурттап турар Тыва Республиканың националдар аразында кады ажылдажылга талазы-биле арга-дуржулгазы улуг дээрзин онзалап демдеглээн. Тываның чоннарының культурлуг өнчүзүн болгаш төөгүлүг ужур-чаңчылдарын камгалаарынче онза кичээнгей салдынган.
А. МОНГУШ.
Чуруктарны ТР-ниң Чазааның парлалга албанындан алган.
“Шын” №5 2026 чылдың февраль 12