Январь 29-тан тура IV Делегей чергелиг буддийжи шуулганга тураскааткан республика чергелиг чалыы даш чонукчуларының аразында «Чонар‑даш–2026» мөөрей эгелээн.
Апрель 4 те “Буддийжи сүлде демдектер болгаш дүрзүлер” деп темага мөөрей үш чадалыг: школа, суму, республика чергелиг эртер.
Мөөрейге киржир күзелдиг школачыларга чонар-даштан сиилбип кылган ажылдарынга буддийжи ёзу-чаңчылдарның эстетиказын көргүзерин сүмелеп турар.
Назы-хар аайы-биле чарган бөлүктерге дараазында даалгаларны айтып турар:
5-8 класстың сургуулдары чырыдыышкынның болгаш арыг чоруктуң сүлде демдээ – улуг хевирлиг “Лотос” скульптуразын сиилбип кылыр;
9-11 класстың сургуулдары “Мерген угаанның болгаш камгалалдың сүлдези” деп темага ажылдарны кылыр.
Мөөрейниң организакчылары бо мөөрей республиканың культурлуг амыдыралынга база бир улуг болуушкун болур деп санап турар.
Чарлаттынган мөөрейден шилиттинген ажылдарны IV Делегей чергелиг буддийжи шуулган үезинде делгелгеге салыр.
Мөөрейниң кол деткикчилери болгаш организакчылары: РФ-тиң сенатору, Федерация Чөвүлелинде ТР-ниң ДХ-ниң төлээзи, социал политика комитединиң кежигүнү Шолбан Күжүгет, ТР-ниң Өөредилге, Культура яамылары болгаш ТР-ниң Камбы-лама эргелели, Россияның сарыг шажын университеди.
Чурукту интернеттен алган.
“Шын” №4 2026 чылдың февраль 5