Тере-Хөл кожууннуң чагырга даргазы Вячеслав Доржуевич Мижит Чазак Даргазының бо чылын кылган ажылдары-даа, салдынган сорулгалары-даа хөй дээрзин демдеглээн: “Дыка-ла хөй ажылдар кылдынганын Чазак Даргазы чугаалады. Ол көргүзүглер, шынап-ла, кончуг эки-дир. Чаа спорт комплекизин-даа, Тубтен Шедруб Линг хүрээзинде Россияның буддийжи университедин-даа ажытты. Оон-даа өске эки чүүлдер хөй. 2025 чылда 6 школаның тудуу доозулган. Ындыг ажылдарны моон-даа соңгаар уламчылаарын даргавыс дыңнаткан. Келир чылын кандыг ажылдар чорударын база кысказы-биле биске чугаалап берди.
IV делегей чергелиг буддийжи шуулганга аалчылар кожууннардан, ылаңгыя волонтёрлар дузазы база кончуг херек. Федералдыг программа-биле соталыг харылзааны кылыр деп турар. Тывада бистиң Куңгуртугну, Мөңгүн-Тайганың Кызыл-Хаяны, Бай-Тайганың Кара-Хөлдү ук программаже киирген. Бистиң суурувуска ол ажылды бо чылын эгелээш, 2027 чылда доостур деп билдим. Оон аңгыда амыдыралга хамаарышкан бүгү-ле айтырыгларны чугаалады. Бис база ол айтырыглар дээш ажылдап турар бис. Чазак Баштыңы төпке чорааш, Россияның Чазак черинден элээн улуг даалгаларны алган болду. Ол дээш Чазак-даа, кожууннар-даа демниг ажылдаарын хүлээнип алдывыс”.
Чыжыргана СААЯ.
Чуруктар Буян ООРЖАКТЫҢ болгаш интернеттен алган.
“Шын” №4 2026 чылдың февраль 5