Улуг-Хем кожууннуң чагырга даргазы Эрес Лопсанчапович Мандан-оол Тываның Баштыңының ажыл-ижинде элээн угланыышкыннарны чүүлдүг деп санаан: “Меңээ, көдээ ажыл-агый талазы-биле ажылдап чораан кижиге, бо адырда эрткен-даа чылгы ажылдарны, келир чылче салган сорулгаларны-даа чүүлдүг-дүр деп санап тур мен. Бистиң Улуг-Хем кожуунга эрткен чылын ниитизи-биле 16 чаа тудугну кылып дооскан. Олар шупту янзы-бүрү программалар-биле туттунган. Чодураа суурда 176 олуттуг чаа школаны ажыткан. Торгалыгда “Сорунза” губернатор төлевилели-биле Культура бажыңын база эмнелгени ажыттывыс. Шагаан-Арыгда 1 дугаар школаның капитал септелгезин чыл төнчүзүнде дооскаш, ажыглалче киирген. Эрткен чазын Уругларның уран чүүл школазының тудуу эгелээн. Ол 2026 чылдың күзүн сентябрь 1-де ажыглалче кирер. 20-30 чыл дургузунда чедир туттунмайн турган тудуг бо чылын ажыглалче кирери ол. Ол ышкаш Шагаан-Арыг хоорайның чылыдылга системазының чер адаанда 6 км ажыг хоорзаларын солааш, чаарт- кан. Малчын кудумчузунда соок суг-биле чурттакчы чонну хандырар барык 4 км хире черде чаа төлевилелди ажылдап дооскан. Ону бо чазын чылый бээрге, май айда, ажыглалче киирер. Тудуг объектилериниң аразында эң-не берге айтырыг — Чылыдылга төвүнүң котельнаязының дугайында Владислав Товарищтайович чугаалады. Ону удавас тудуп эгелээр, а келир чылын сентябрь 1-де ажыглалче киирер кылдыр төлевилелде айтып каан. Ооң документилерин шуптузун белен кылдыр ажылдап кылган. Ооң-биле чергелештир Шагаан-Арыгда хөй талалыг спорт залының тудуу база эгелей берген. Акшаландырыышкыны чедип келген. Ол келир чылын ажыглалга кирер. Кожууннар-даа, суурлар-даа, найысылал Кызыл-даа каракка көзүлдүр-ле сайзырап олур. Чеже-чеже тудуглар туттунуп тур. Бо бүгүнү көөрге, дыка-ла өөрүнчүг-дүр. Ынчангаш Чазак Баштыңының кылып чорудуп турар ажылын үргүлчү чүүлдүгзүнүп, деткип турар бис”.
Чурукту интернеттен хоолгалаан.
"Шын" №4 2026 чылдың февраль 5